سن که جانانین یولوندا اِیلیوبسن ترک سَر اولموشام منده مصمم اِیلیم شامه سَفر ئولمَسم قارداش گتیرم شامیدن عالی خَبر بیر خبر که زینبوندن یادگار اولسون حسین

ای اولان ظلمیله بو صحراده غلطان قانینه شامیده اوت سالماسام گر لَشکرین ارکانینه اوندا من دینجلمرم آند اولسون اکبر جانینه شامیان بو فعله مندن انتظار اولسون حسین

بیله فکر اِیلوردیلر تا عالمین دادرسی قانه غلطان اولمیوب باتماز همین وحدت سَسی وحدتین حفظ اِیتدی اَهلون با کمال بی کسی کلمه وحدت بویورموشدون شعار اولسون حسین

ساغر پرخونون اولدی تا گواه راه عشق مست مست اولدون او بیر پیمانه دن ای شاه عشق منده مستانه او دم اولدوم سنه همراه عشق یار اودور ئوز یارینه هر یرده یار اولسون حسین

کارزاره عزم اِیدن لحظه، سن ای شاه شهید اود دوتوب اودلاندی قلبیم چون که قالمیشدون وحید غیرت ا... غیرتی منده اودور اولدی پدید قطب عالم قویمادیم درده دچار اولسون حسین

گوشه چشمیله تا خرگاهیوه ایتدون نگاه آنلادیم منظوریوی ای خسرو زرین کلاه شاهی لازمدور سوار مرکب ایتسون سرسپاه مرکبه سلطان سَرمَد تا سوار اولسون حسین

برج زین اوستَن طلوع اِیتدون که سن خورشید وَش چرخ چارمدا توکوبدور عارضه خورشید رَش باده ایصالیوه زینب دیردی العطش زینبین کامی مبادا ناگوار اولسون حسین!!

مرکبه مهمیز چکدون فاتح خیبر کیمین لشکره اولدون مقابل ضیغم صفدر کیمین گوئیا صفینیدور جنگ ایلدون حیدر کیمین بیر نولاردی سطوتین بیرده کِرار اولسون حسین

حمله ایتدون لشکر ابن زیادین هنگینه بیر قلج ویردون ازل سر کرده لر سرهنگینه لشگر بی رحمی سالدون ذوالجناحین تنگینه سَس گلوردی عرصه دن لشکر کنار اولسون حسین

بَنزرین وار جنگیده الحق که شیر داوره ذوالفقارین اوت توکوردی دم به دم بحر و بره جنگ صفینی نشان ویردون دوباره لشکره آز قالوردی کل لشکر تار مار اولسون حسین

ناگهان بیر اوخ یتیشدی قلبیوی اِیتدی مکان غیره گوردون که مکان اولماز مکان لامکان مرکب اوستونده یاپشدون بیر اوخا ویردون تَکان اولمادی خارج ، نَدن سوز پرده دار اولسون حسین

الامان و الامان و الامان و الامان الامان مین یول او دمدن قدیوی اِیتدون کمان لاجرم چکدون اوخی سن پشت سَردن ناگهان وار یری بو فعله عالم اشکبار اولسون حسین