سلام بر مهدی صاحب الزمان عج
سلام اولسون سنه ای دلبر فرزانه یا مهدی
آقا امداده گل قلبیم دونوب القانه یا مهدی
نفس دن دوشموشم سس وئر منه بو غملی دنیاده
یاخیندیر کاخ آمالیم اولا ویرانه یا مهدی
یاغیر هر سمتیدن فتنه اوزون گل دوز یولی گوستر
که سنسن ترجمان واقعی قرانه یا مهدی
محبت اهلی چوخداندیر فراقینده پریشان دیر
حضور اقدسونده دل چاتار سامانه یا مهدی
اماندی آزقالیر عمریم گونی دونسون شب تاره
نولار لطف ائیلسه ن بو نوکر نالانه یا مهدی
نقدری جمعه ساییدیم ، هفته لر آیلار ایله دوندی
گلر بو غملی دورانلار هاچان پایانه یا مهدی
گئجه گوندوز گوزوم یاشی آخار حسرتله هجرونده
نظر قیل لطفیله بو دیده گریانه یا مهدی
زمانه تنگه گتدی سینمی دوشدوم نفس دن گل
دونوب عالم گوزوم ده بیر قرا زندانه یا مهدی
بیزیم احوالیمزدان آگهم حالی پریشان سان
جانیم قربان سنین تک مهربان جانانه یا مهدی
گل ای بحر کرم دنیا دولوب فقر محبت دن
جهان لب تشنه دور بیر عمردور احسانه یا مهدی
بو دور قورخوم ئولم اما جمالین گورمییم بیر دم
رضایم که قادان گلسین بو خسته جانه یا مهدی
✍مدهوش (هوشمند)۱۴۰۲
#امام_زمان_عجل_الله
#جمعه_های_دلتنگی
#