دور ای ساقی گل چهره گتور جام محبّت دن 💐🌿💐در مدح جناب اسدالله الغالب علی بن ابی طالب علیه السلام #مرحوم دلریش . دور ای ساقی گل چهره گتور جام محبّت دن ایچوم بیدار اولوم بلکه بو دم من خواب غفلتدن . او می دن ساقیا هر کیمسنه بیر جرعه نوش ائتسه اولور رند جهان بی شک چیخار قلبی قساوتدن . او می دن جرعه ای نوش ایلیوبدور آدم و حوا که آخرده یتوب وصله یقیناً اول علامتدن . بلی تأثیر اول می دور یقین ای ساقی دوران که یوسف یتدی یعقوبه خلاص اولدی او محنتدن . خلیل اللهه ای ساقی ندن آتش اولوب گلشن ایچوبدور جرعه ای می دن قوتولدی اول حرارتدن . ایچوبدور حضرت یحیی اولوب آسوده زحمتدن که کسدیلر باشین تشنه اونون اعدا عداوتدن . دولانوم باشیوه ساقی گتور پیمانه پی در پی منی منع ائتمه ای ساقی بو نوعی عیش و عشرتدن . محبّت جامینی ساقی اگر من ایچمسم آخر هراسیم چوخدی باللهی منیم روز قیامتدن . سنه قربان اولوم ساقی گتور اول جام گلرنگی من نالانه رحم ایله گوتور ال بو نزاکتدن . منی مست ایله بو می دن که ای ساقی خوش سیما عبارتدور جهان ایچره او می حبّ ولایتدن . اونا هر کیم محبّ اولسا او گورمز آتش نیران ندامتدور بو ال چکمک بئله کان کرامتدن . بئله مولایه مین دفعه منیم جانیم اولا قربان که قویماز شیعه سین پروا ائده نار قیامتدن . بو شاهین یوخدی عالمده یقیناً مثل و مانندی گلوب چوخ آیه شأنینده اونون خلّاق قدرتدن . غدیر خمّیده گلدی ولی لوق شأنی اول شاهه بونی انکار ائدن کافر گوتور ال بیر حماقتدن . بو شهدور آلتی آیلوقدا بؤلوب گهواره ده اژدر بو شهدور باج آلان روم و فرنگ و هر ولایتدن . بو شهدور باغلیان یاجوج سدّین یوخدی بیر شکّی بو شهدور پاک ائدن دین رسولی عیب و علّتدن