بنام خدا
مدح ومنقبت حضرت ام البنین س وحضرت #ابوالفضل_العباس_ع وگریز به آموزش شمشیر زنی با دستان بسته براو توسط مولا علی ع و....
"" "" "" "" "" "
مرحبا صد مرحبا احسن سنه ام البنین
تربیت ایلوب سن الحق آیری بیر شور آفرین
بعد زهرا اولموسان همراز وهم آوای عشق
دامنوندان پَر آچوب عنقای بی پروای عشق
عطر زهرائیله بسلوب سن کرم دریاسینی
عشقیلن؛سیراب ائدیب سن کربلا سقاسینی
آلموسان آغوشه هردم زینب غم پروری
زلفینه شانه وروبسان همچو زهرا مادری
سن علی شیرخدایه یارو غمخوار اولموسان
سن ولایت گلشن ینده همدم یار اولموسان
سن باخوبسان مجتبایه همچو زهرای بتول
راضی اولموبسان اولا دردانهٔ زهرا ملول
دیندیروب سن؛ سن حسینی بازبان مادری
قویمایوبسان بحر غمده غرق‌اولا اول گوهری
دیندیروبسن آیری دیلده حضرت عباسی سن
شیر‌هیجا بسلیوب سن اول یل احساسی سن
عالمین عشاقینون قلبی ابولفضله اسیر
عالم مهر و وفاده یوخدی عباسه نظیر
خلق ائدیب حیدر کیمی عباسی خالق بی‌بدیل
حیدری خو؛با شهامت؛صورتی آیدان جمیل
شیر‌هیجایه وئروب‌دی مادری پاکیزه شیر
آفرین ام البنینه بسلیوب بیر بئیله شیر
ه‍رآنا بیردفعه گور‌سیدی او رعنا قامتی
یاندوراردی کوچه و بازاری آه و حسرتی
سویلویردی کاش منه بیر بئیله پای وئرسین خدا
حضرت عباسه تای بیر پارچا آی وئرسون خدا
سویلویردی بو بالا زیبالرین زیباسی دی
صورتی آیدان گوزلدی مرتضی هیجا‌سی دی
سویلویردی:کاش منیم ده بیر بئله اوغلوم اولا
اوغلومون آوازه سی میخانهٔ عشقه دولا
بیر بئله اوغلوم گر اولسا عالمه ناز ائیلرم
ساز عشقی اوغلومون عشقینده من ساز ائیلرم
بیر بئله اوغلوم گر اولسا جان دئیوب جان سسله‌رم
باشینه هردم دولانّام جانینه جان بسلرم
اولمارام راضی بالام بیر لحظه ناشاد اولسا گر
منده اولَّّم بو گولون عمر بهاری سولسا گر
هی باخاردی حضرت ام البنین عباسینه
فخر ائدردی طول بازو قامت رعنا سینه
نقش عباسی گوزل نقش ائیله میشدی کردگار
صورت عباسی آی شکلینده چَکموشدی نگار
غرق اولوردی گون به گون مادر ابوالفضل عشقینه
ناظر اولدی اوغلونون بیر آیری جنگی مشقینه
گوردی مولا باغلا‌یوب عباسینون قولارینی
عرصهٔ جنگین او شیره اورگدور اسرارینی
قولارین تا باغلی گوردی اوغلونون ام‌البنین
بیلدی وار سرِّ دگر بومشقیده اولدی حزین
یوز توتوب مولایه مادر واقف اولسون سِرّیدن
باغلایوبسان یا‌علی بوقولاری آیا ندن
ائتدی فرمایش اودم ام البنینه مرتضی
وار قاباخ گونلرده بیر جنگ وجدال ماسوا
بیرگون اعدا عرصه‌نی عباسیمه تنگ ائیلویر
ایستورم بیلسین او‌گون قولسوز نئجه جنگ ائیلیر
داد اوساعتدن ائدیب اعدا او قولاری قلم
بیلمورم اول حالتی آیا نئجه یازسین قلم
ساق گوزوندن دگدی اوخ قولاری دوشدی توپراقا
اول زمان ادرک صداسی قاخدی یئردن آفاقا
توپراقا؛ آتدان دوشن لحظه اوقول سیز پیکری
آلدی آغوشه اونی پهلو شکسته مادری
ائتدی فرمایش اوغول ایثاری معنا ائیلدون
دفتر،عشاقی سن لب تشنه امضا ائیلدون
یاخشی یار اولدون حسینه بو دل صحراده سن
سرفراز اولدون ابوالفضل هرایکی دنیاده سن
طاقتیم طاق اولدی اولدم دگدی اوخ رخساریوه
قانلی یاش؛آخدی گوزوندان صورت غم باریوه
یاندی سینه م او زمان کی قولارون اولدی قلم
سینون اوسته چاپدی آتلار دوشدی توپراقه علم
سن دوشنده توپراق اوسته قدسیان قان آغلادی
حال غم بارون اوغول قلب جهانی داغلادی
گلموشم بوچولده اوغلوم من سنه ماتم قورام
من قویام؛باشون دیز اوسته لحظه ای آرام اولام
گئت اوغول قان آغلایوراحوالیوه ارض و سما
گوزتیکوب یولاریوه جناتیده آل عبا
ساخلادون تالحظهٔ آخر اوغول دین پرچمین
گئت داخی گلمز جهانه سن کیمی شورآفرین
فاخرم قدر توانیم بنده یازدیم بوسوزی
وار امیدیم ائیلویه عباس آقام احسان اوزی
بو مقدس عشقینی عالمده بیزدن المویا
مادح و مستمع و احبابی گوزدن سالمویا
🌿🍃🌿🍃🌿🍃🌿🍃