یا حضرت زینب کبری (س) زینبا درگاهووه اولدوم گدا سیندیرمادون دست حاجت آچدیم ائتدیم التجا سیندیرمادون هاردا دوشدوم درده من ائتدیم توسل آدیووه بوش الیم یوخدان یتیشدی تئز وارا سیندیرمادون مین امیدیله گئچن گونلر کیمی گلدیم گینه ال ادبدن بوش ، یوزوم کولدن قرا سیندیرمادون صاحب اولدون ئوز قاپوندا خوار اولان مردار ایته قویمادون ویرسونلا طعن و افترا سیندیرمادون سن منه صاحب دوران یئرده هئچ عالم دورماسین ساخلادون سن ، چوخلار ائتمیشدی رها سیندیرمادون فکر ائدوبلر سن قووبسان ئوز قاپوندان بو ایتی ائتدیلر بو فکریلن قصد جفا سیندیرمادون گوردی دشمن قومیوبسان درگه پاکونده یم کلب زینب رتبه سین ائتدون عطا سیندیرمادون غافل اولدوم هر زمان گتدیم اوزاق درگاهیدن خوار اولاندا تئز گینه ائتدون صدا سیندیرمادون یا هاچان بیگانه آللاتدی ایتوردوم من سنی سسلدیم فوراً گینه وئردون ندا سیندیرمادون سینماسین شخصیتون ای عصمتین شخصیتی بیلمدون نا حقی حقیمده روا سیندیرمادون سن وئرن شخصیتیله من سرافرازم خانم قویمادون هیچکس اونی مندن آلا سیندیرمادون چوخ قاپی گورستدیلر ، چوخ آد منه ئورگتدیلر من ولی بیلدیم سنی باب رجا سیندیرمادون کیم منی چکدی هارا ، اما وفالی ایت کیمی گئتمدیم درگاه پاکوندن یانا سیندیرمادون عشقووی ئوز قلبیمون قلاده قیلدیم بوینونا آدیوی ازبر ائدوب گئتدیم هارا سیندیرمادون منده گیدیم قاره کوینک قاره باشه باغلادیم اذن وئردون آغلییوب قیلدیم نوا سیندیرمادون پاک عزاداره اگر چه اوخشاموردی صورتیم ائتمدون سن آغلیانلاردان جدا سیندیرمادون قصد تطهیر ایلیوب دوشدوم حسین دوزلاقینه پاک ائده بلکه منی بزم عزا سیندیرمادون