زبانحال امام حسین (ع)در بالین حضرت علی اکبر (ع)
سس وئر حسینه یاتما ای قهرمانیم اکبر
حمل ایلییم جنازون یوخدور توانیم اکبر
اود ووردی ماسوایه بو رسم و بو رَویّه
آرامیمی آلوبدی محنتلی بیر قضیه
دور یاتما بوردا اوغلوم گوزلور سنی رقیه
تل اوسته منتظردور شیرین زبانیم اکبر
قانون آخوبدی باشدان نم نم ترابون اوسته
گول پایمال اولوبدی خوشبو گلابون اوسته
اوراق اولوبدی سینون حفظ کتابون اوسته
یاندیردی کایناتی سوز نهانیم اکبر
مرکب بلینده گلدیم شام اهلینه گوروندوم
یدی قدم قالاندا گوز یاشیمه بوروندوم
اوردان جنازون اوسته مجنون کیمی سوروندوم
ال دوتماسون دوزلمز قد کمانیم اکبر
گلشنده پیکرون تک هئچ لاله پرپر اولماز
پرپرده اولسا شاید سن تک معطر اولماز
یوسف عوض وئریلسه لیلایه اکبر اولماز
سسلر دئیر ئولونجک ای وای جوانیم اکبر
یوسف گرک قاپوندا دربانون اولسون اوغلوم
مین یول بو خسته جانیم قربانون اولسون اوغلوم
گوز یاشیمی توکوم قوی درمانون اولسون اوغلوم
واللهی گوز یاشیمدان یوخدور امانیم اکبر
*
حاج حسین غفاری اردبیلی