🏴 احوالات اربعین ، اثر طبع روان مرحوم استاد تقایی اردبیلی
◾️🔽◾️🔽◾️🔽◾️🔽◾️
امید ائوی دور زینبه شش گوشه مزارون
گرچه منه خوش خاطره سی یوخ بو دیارون
اما گینه چکمیش بو یره جذبه سی یارون
بو قلبی سینیق غصّه چکن یاری حسینیم
دشمن منی ایستکلی نگاریمدن آییردی
قمچی گوجینه پیکر یاریمدن آییردی
صرصر یلی گر فصل بهاریمدن آییردی
دل تاپدی گینه یاره لی دلداری حسینیم
پروانه لرون شمع فراقونده یانوبلار
قول باغلی بلا کوچه لرینده دولانوبلار
الان که مزارونله مقابل دایانوبلار
چوخدور بولارون یاره لی ، یماری حسینیم
غارت گونی گوردوم قوشون آرتیردی فشاری
امداده چاغیردیم سنی ای حجّت باری
مقتلده یوزی اوسته سوروندون منه ساری
خوشدور سورونم مرقدووه ساری حسینیم
یوخ بیر کسی گرچه باجووا حق ئوزی کسدی
عشقونده گرفتاریدی پر شوق و هوسدی
زینب نه قدر اینجیسه ده تازه نفسدی
قویماز یتیشه کامینه اشراری حسینیم
خولی سنون حقونده حسین ایلدی بیداد
قویدی کولون اوسته باشون ای سرور امجاد
عطریله یودی باشووی راهب ائوی آباد
ارشاد ائلدون سن او نکوکاری حسینیم
توش اولدی اورک تیر مصیباته قوجالدیم
پیشوازیمه هر یرده باشون گلدی اوجالدیم
داش دگدی سنون باشووه باش محمله چالدیم
قان ایلدی آغ ساچلاری گلناری حسینیم
🖋️مرحوم استاد حاج محمد تقایی
اربعین