اربعین حسینی بهزاد قاسمی زینبم من یوخ توانیم ، باغ امیدیم سولوب اربعینوندور حسین جان ، ابر احساسیم دولوب قبریوه بیر دسته یورقون یاسمن زوّار اولوب سالمیشام منده بو قبرین اوسته قانلے جامه وی گوز یاشیملان تا یازام قارداش زیارتنامه وی اَلسَّلام اے ذبح اعظم اے شهید بے ڪفن اَلسَّلام اے لبلرے آب فراته ناز ائدن اَلسَّلام اے قتلگاهه هم سوسوز هم آج گیدن اَلسَّلام اے عمرینه پایان جاویدان وئرن اَلسَّلام اے گونلرین آلتیندا عریان جان وئرن اَلسَّلام اے مغرب گودالیده آے تک باتان اَلسَّلام اے نازدانه قیزلارین گوزدن آتان اَلسَّلام اے قانلے باشے ڪوللر اوستونده یاتان اَلسَّلام اے دفترعرفانے نوریلن یازان اَلسَّلام اے ئوز الیلن اصغرین قبرین قازان دور منه سس وئر سلامیم قویما قالسون بے جواب قالمیوب اهل و عیالونده حسین جان صبر و تاب آند اولا زهرایه قارداش آز قالور ئولسون رباب معجرین باشدان آچوب ، گوزدن توڪور اشک ترین قبریوون اوسته دوشوبدور ، سندن ایستور اصغرین یول یوروبدور ڪاروانے یورقونوق یوخ تابیمیز آسمان غمده مدّتدور باتوب مهتابیمیز گلمیشوک دیداریوه آے بے ڪفن اربابیمیز معرفت بازارینون بیز نابغه تجُّاریوڪ دور ئوزون خوشگلدون ائله اربعین زُوّاریوڪ میهمانوق بیز سنه مهمان نواز اول ائتمه ناز آلمیشوق عشق عالمینده گوز یاشیلان دستماز دور اذان وئر تا قیلاق با هم ایڪے رڪعت نماز گوگلوم ایستور عشقیمے دنیایه اثبات ایلیم باشوین قانے آخان یرده مناجات ایلیم من بورا گلدیم بو گون تا سنله دیدار ایلیم عشق دیوانین آچام ، بیر یولدا گفتار ایلیم ئوز قیامیمدن سنے قارداش خبردار ایلیم شڪر اولا پروردگاره رو سفید اولدوم حسین عامل سرڪوبیِ آل یزید اولدوم حسین پرچم قرآنے قالخیزدیم گویه سقّا ڪیمین ذلّته باش اگمدیم حوّا ڪیمین ، سارا ڪیمین ئوز امامیمدن دفاع ائتدیم ننم زهرا ڪیمین سسلدیم حقدور حسین ، عشقین باشیمدان آتمارام من اونون تک بیر توڪون هفت آسمانه ساتمارام دوزدے ظاهرده گئدوب الدن جلال و منصبی علقم اوستونده یاتوب عباس تک هم مڪتبی سیزلرے خوار ائتمگه امّا هله وار زینبی مڪر و تهدیدیله سینماز زینبین شخصیتی وار منیم چادر شبیمده ذوالفقارین قدرتی الغرض قارداش او گون من عشقے تفسیر ایلدیم نطق آتشباریمے برّنده شمشیر ایلدیم من یزیدے ڪاخ خضراسینده تحقیر ایلدیم ثابت ائتدیم عالمه ئوز عهدیم اوسته صادقم تک باجے یوخ ، اللے دورت ایلدور حسینه عاشقم ایندے امّا خسته یم ، صبرین لباسین سویموشام عمریمے سوداے عشقونده ضمانت قویموشام آند اولا ئوز جانیوه داے زندگیدن دویموشام یوخ توانیم ، قاره بختیم تک باشیمدا قاره وار گویلرین اولدوزلاریندان چوخ قولومدا یاره وار آے یاریمدور در بدر دور یثربون آهولری شانیه حسرت قالوبدور شانه سیز گیسولری ڪعب نیزه یلن سینوب بعضے لرین پهلولری چوخ سوزے من آچمورام ، چون محنت عظماسے وار زینبون بو ڪارواندا گور نچه زهراسے وار انقلابیم ووردے قارداش سینۀ اشراره اوخ سن منه سس وئرمَسوندَه ، وئرمه ، نینَک عیبے یوخ تڪجه بیر خواهش واریم سندن ، ثوابے چوخدے چوخ گر چه زحمتدور ولے سعے ائله اجرا ائت حسین بیر گجه امڪانون اولسا شهر شامه گئت حسین اوردا چون ایستڪلے بیر قیز واردے چوخ ایستر سنی او منه خردا باجیدے ، قویدے امّا تک منی قبرینے قازدیم اوزوم ، ویرانه اولدے مدفنی گورمَدے خوش گون جهاندا ، گِتدے جاه و منصبی الله عالمدے اونون دردے قوجاتدے زینبی هے دئیردے هاردا بس قالدے منیم مظلوم بابام داے داریخدیم عمه جان ، یوردے منے بو شهر شام اینجیدیم یول گوزلمڪدن ، ڪاش اولا عمروم تمام آغلورام از بس ڪے من ، قانه دونوب گوز یاشلاریم نه بابامدان بیر خبر وار ، نه گلور قارداشلاریم #اربعیــن_۱۴۰۳ #حضرت_زینب_سلام_الله_علیها #کانال_باب_الحوائج http://eitaa.com/torkiy