#زبانحال_حضرت_امام_جعفر_صادق_علیه_السلام خداوندا گُواه اُول عُمرومُون آخر زَمانیندَه بُو صادق بَنده وین اَمنیّتی یوخ دودمانیندَه گُوزومدَه روزِ روشن شامِ تاریکَه اُولوب تَبدیل خیالِ سَلطنت وار مَندَه مَنصُورون خیالیندَه رَبیعین اُوغلی گَلدی بیر گِئجه بیردَن بیزه غافل اِئوی تَفتیش قیلدی آلتین اُوستُون اُوز مَکانیندَه اُوشاقلار قورخوشوب تیترشدی تَک تَک اُولدی ناراحَت یُوخی قاچدی دوگُولدی قَلبی پیریندَه جَوانیندَه دوباره بیر گِئجه نِچّه نَفر دِیواریدَن دوشدی اُولار مانع اُولوب اَطفالیمُون داد و فَغانیندَه اُولاردا آختاروبلار مَنزلین هر گُوشه سین بیر بیر واریدی هر کیمون هر قَدر نیروسی تَوانیندَه اُوزومی دَستگیر اِئتسونلَه آخر دوتدولار تَصمیم مَنه نَسبت عَداوَت واریدی گُویا نَهانیندَه نَماز اُوستن مَنی جَلب اِئتدیلَر مأموریلَر جَبراً خُشونتلَه تِئز اُول تَهدید کَلماتی دَهانیندَه عَبا عَمّامه سیز چَکدی مَنی اَشرارِ سَنگَین دل عَدالَت عالمیندَن بی خَبر ظُلمُون جَهانیندَه اَسیرانه دایاندیم تا که مَنصُورون قَباقیندَه نه مَنصُورون حُضوری بَلکه مَرگین آستانیندَه مَنه مَست عالمیندَه خیر خیره باخدی بیر گُولدی عَلاوه گُولماقی دُشنام اَلفاظی زَبانیندَه خیالُوندَن گِئچُوردی بُوینومی شَمشیریلَن وورسُون گِئجه نُون عالمی چوخ گُوزلَرین یاتمیش زَمانیندَه گُوزی ناگه دوشُوب جَدّیم رَسول اللّهه مَجلسدَه غَضبلی، نازنین اَل، بندِ تیغِ جان سِتانیندَه اِیتوردی اُوز اُوزون آغزیندا کی باطل سُوزی قالدی او خون آشامُون آناً اِختلال اُولدی بَیانیندَه سُوون طَرزین دَگیشدی قورخُوسُندان دوردی هُولیلَه مَنی اُوز تَختینون اُوستوندَه اَگلشدیردی یانیندَه مُرخّص اِیلدی اَلقصّه گَلدیم مَنزلَه بیردَه اِئدَم دیدار تا مَحرملَرین خُرد و کُباریندَه یِتیشدی فکریمَه جَدّیم حُسینون روزِ عاشورا او وَحشتلَه اُولان اَطفالینُون اَشگِ رَوانیندَه #زنده_یاد_حافظی_رحمت_الله_علیه لینگ کانال در ایتا 👇👇👇👇 ﷽🍁 @Ghateelolabaraat ✨اَللّهُمَّ عَجِّل لِوَلیِّکَ الفَرَج✨💫