نوحه حضرت عباس یخیلدی سقا یره باش یارالی قان گلور او سسلنور یا حسین داده اوخ ووران گلور یا حسین یا حسین گل هرایه هارداسان گلدی زهرا آنام کربلایه هارداسان دوزدی بلالی اولار پهلوان لارین باشی دعوا گونونده سینار قهرمانلارین باشی قوی اولسون بو داستان داستان لارین باشی قولسوز علمدار اولوب باش یارانلارین باشی یاردیلار باشیمی بیر آغیر عمودیله دوشموشم تپراقا یاره لی وجودیله من سنی ای یوسفیم ساتمادیم اهریمنه قالدیم بویاندیم قانا منّت اولماسین سنه بسدی فقط فاطمه لای لای دئسون منه او سسله سین جان بالا من ده دیوم جان ننه گلدی زهرا ولی سینه سی یارالی دی قلبیمی یاندیران نیلگون جمالیدی غملی امان نامه نین ماجراسی بیر یانا قیزلاریوین قورخوردان آه و واسی بیر یانا پرچم توتان اللرین ابتلاسی بیر یانا بو یاره لر بیر یانا دل یاراسی بیر یانا طعنه دشمن وورور قلبیدن یارالیام خالی مشگیم کیمی من ده دست خالیام موضوع: #حضرت_عباس سبک: #یخیلدی_سقا_یره شاعر: #کلامی_زنجانی

نوحه روز عاشورا یخیلمیشام مقتله قان وئرور یارالاریم یولومی گوزلور منیم خیمه ده بالالاریم ای خدا من سنون عشقووه وفالی ام اوخ دگوب سینه مون باشینه یارالی ام گون دوشوبدی تپراقا قانلی بستریم یانور اوخ دگوبدی سینه مه داغ اکبریم یانور آند اولا عباسیمه تشنه لبلریم یانور بو غملی احوالیمه عرش داوریم یانور ای خدا راضی اُل نیلیوم خجالتم یاز منیم آدیمی عاشق شهادتم وئرمدی الدن حسین سن کیمی گوزل یاری یالوارمادیم دشمنه بیر ایچیم سودان ساری قرآنی من ساخلادیم سنده ساخلا قیزلاری خیمه لرین گلشنی وار جنانه اوخشاری اود وورار دشمنیم خیمه گاهیم اودلانار قیزلارون دامنی خیمه لر کیمین یانار موضوع: #روز_عاشورا سبک: #یخیلدی_سقا_یره شاعر: #غفاری_اردبیلی

نوحه حضرت رقیه گل دادیمه عمه جان گل دوداقه جان گلوب منیم یارالی بابام لبلرینده قان گلوب وای منه وای منه مهربان قوناقه باخ من باخا بیلمورم یاره لی دوداقه باخ الله مسافرلری سالماسین یامان گونه هانسی مسافر دوشر بو بابام قالان گونه هی دئدیم گئتمه بو یول خطرلیدی بابا کربلا یولّاری دردسرلیدی بابا من بو باشین عمه جان یوز گوزون گرک یووام حقدن ئولوم ایسترم مستجاب اولار دعام دردیمین سهمینی هئچ کسیله بولمرم قویما گئتسین بابام گئتسه راحت ئولمرم باد صبا دردیمی یاریمه یتورمدی گلدی بابام حیف اولا اصغری گتورمدی منتظر دی گوزوم قانه دوندی گوزیاشیم قورتار الله منی هاردا قالدی قارداشیم من بیلوردوم سویگولوم اختارار تاپار منی گلدی یوخوما گئجه گل دئدیم اپار منی عمه زهرا جانی یار آپاردی صبریمی اکبریم گلمدی قاز منیمده قبریمی یورقون بالام آغلاما فاطمه قوناقینه اوپ باباوین آندینی باخما چوخ دوداقینه آغلاما آغلاما قانه قاتما گوز یاشین قوی قالا سینه ده ماجراسی بو باشین موضوع: #حضرت_رقیه سبک: #یخیلدی_سقا_یره شاعر: #کلامی_زنجانی

نوحه حضرت زهرا علیها سلام زینبون قربان سنه باغریم اولدی قان ننه صبحه کیمی سسلرم جان یارالی جان ننه گون باتار آی چیخار دیزلریم قوجاخلارام شمع تک اود دوتوب یانه یانه آغلارام گورسم سینوب ساقه دن گُل چمنده آغلارام سینمیش گُلون حالینه یِل اَسنده آغلارام مسماریده قانووی هر گورنده آغلارام ساللام سنی یادیمه جان وئرنده آغلارام اولمادی قارداشون دردیوه شریک اولا قیزلارون نیمه شب سالدیلار سنی یولا زینب دئمه تک قالوب ماتموندی یولداشیم قویماز سولا گُل لرون چشمه چشمه گوز یاشیم گَل هارداسان آی ننه شانه سیز قالوب باشیم گرچه چکر نازیمی نازدانه قارداشیم بسترون بوش قالوب آی جوان ئولن ننه کوینگین سائله طوی گونی وئرن ننه وئردی بابام غسلووی باخدی باخدی آغلادی سیلی یرین گورجگین گوزلرینی باغلادی غیرتیندن تیترَدی عالمینی داغلادی سسلندی آی یاسمن! کیم سنی ایاخلادی قلبیمی یاندیران قبرووه گوزوم فدا کاسه سی داشلانان صبرووه ئوزوم فدا موضوع: #حضرت_زهرا علیها سلام سبک: #یخیلدی_سقا_یره شاعر: #غفاری_اردبیلی