آتاسیزلیق دردی #ختم_خوانی #گریز #حضرت_رقیه_شهادت . جعفر فتح اللهی (شاکر) . زمانه نین یوزونه گولمز هئچ زمان آتاسیز آتالیق عاطفه سین ایلمز نهان آتاسیز . گئدر گزر دولانار بلکه غصه سی داغیلا بیر آزدا غصه سی آرتار ائدر فغان آتاسیز . گورنده تای توشونی نوز آتاسی ایله گزور چکر بیر آه اولار قلب زاری قان آتاسیز . ایکی الینی قویار قوینونا باخار مأیوس ایکی گوزوندن ائدر اشکینی روان آتاسیز . آتاسی ایله گزن گونلری دوشر یادینا دانیشار ئوز ئوزونه محنته نشان آتاسیز . باشین اشاقه سالار ناگران ائوه قییدر ائدر قاپونی آچاندا بئله گمان آتاسیز . آتاسی ائوده دی تئز تئز بابا بابا چاغیرار سسین ائشیدمز ئوزون گورمز آختاران آتاسیز . اتاقه وارد اولار غم دورار قباقینده دیر آتان یرینه غمدی میهمان آتاسیز . آتاسینون یرینی بوش گورر اوتاقینده اوخور ئوزی ئوزینه غملی داستان آتاسیز . اولاندا بایرام هامی آل یاشیل گییوب دولانار قرا گییوب ئوزون ایلر غم آشیان آتاسیز . اوشاقینه آتا بایرامدا عیدیانه آلار قالار ولی گوزی اللرده ناگران آتاسیز . گئدر هامی گوروشه خویش و اقربا ائوینه قالوب ائوینده قورا بزم جان بستان آتاسیز . اوشاق أَولجه دییر ئوز آتاسینا تبریک دییر منی آتاجان گورمسین زمان آتاسیز . مشاهده ایلیرسوز چیخاندا قبر اوسته آتا مزارین ائدر بهترین مکان آتاسیز . گورر آناسینی غم دیزلرین قوجاقه آلوب باخار یانا یانا نار غمه یانان آتاسیز . آچار قولون دولیار بوینونا سیلر گوزونی دییر چوخ آغلاما گرچه قالوب بالان آتاسیز . سن آغلاسان بو قدر من ئوزومی ئولدورّم بو درده دوزمز اوشاق اولسا یا جوان آتاسیز . آتام کمی منی دیندیر سینقدی گویلومی آل سولار، سینار، سارالار گویلون آلماسان آتاسیز . آتام حسینه فدا من فدا رقیه سینه ایتیم اوشاقلارا سردسته دی همان آتاسیز . گئدردی زینیین آغوشینه گلردی دیله دییردی پس منی کیم قویدی عمه جان آتاسیز . بابام گئدندن آی عمه یاتانمورام گئجه لر مگر یاتار بو بیاباندا قورخودان آتاسیز . مدینیه گئده بیلسن یوبانما تئز یولا دوش روا دگیل اولا دشمنله همزبان آتاسیز . من ئولمه میش آپار عمه مدینه میزده ئولوم عزاسی خوار اولی غربتده وئرسه جان آتاسیز . بو غربت ئولکه ده که خوار اولوب آتام یاسی دوشنده یاده بو مشگل ییوبدى قان آتاسیز . من آغلادیم باباما قمچی ووردیلار باشیما آتاسین اوخشیا لازمدی هر زمان آتاسیز . گوزوم دوشور آتامی ئولدورنلرین گوزونه آلور قراریمی الان منی قویان آتاسیز . اوتوندا الله اوشاقین یامان گونه قویسون منیم کیمی اودا بیلسین اولار یامان آتاسیز . اونوندا قلبی داریخسین تفاقی اودلانسین بئله نقدری یانور خیمه سی یانان آتاسیز . .  #فتح_اللهی