✳️ شعر کیجا و ریکا : ⭐️ قسمت اول ⭐️ ونه بوئم آسنی پاییز و زمسّنی پار پیرار دوره وه تش کله و کوره وه زناکنن دور هم گب زونه از بیش و کم گته پَلَت دارِ بن یا که شینه او دیزن جم ونه کب بافتنه حرفای خُب بافتنه سبزی ره پاک کردنه پیازه چاک کردنه کلِن زونه لَوِه ره تیهن، سیاه قله ره چشمه ی او وه بچا وشونِ تِک، گب نِچا گب زونه از محله کردنه هی همهمه خاله چی دارنی خَور این سر واون مله سر پایین، جِم و جاس نیه جغْ چِمِرِی راس نیه اِتی که خاک بخاردون یا که همه بمردون دایی نشا نشیئه؟ امام رضا نشیئه؟ ناصر اره بهیته؟ چپون کره بهیته؟ کرک و سگ و چینکا خور گیتنه یکجا بوته خور نارنّی همش فکر کارنّی نرگیس عروس بِزا منیجه نا زلیخا اونتا عروس که زیکه قشنگ چشم و مجیکه فیس و افاده داشته گیسه به قایده داشته می داشته وه حنایی دِسبِن ونه طلایی دامن چین دار داشته خیلی طرفدار داشته خاب وه قدم خار ووئه وه دوش برار ووئه گت بوو کار هاکنه تیم و تیمجار هاکنه لت بزنه، دمرده خدمت بوره دگرده جان خاخر چی گنی گب مَسّی مَسّی گنی این وچه هم کیجائه دشتِ خنه، عزائه هین سومین بزائه وشونِ فیس بچائه سرکو زننه عروس ای بزایی تو ملوس چِیِر ریکا نیارده شاخ طلا نیارده دس هائیره وه تورّه برسّه اسب و گورّه سر بزنه گوئن ره ماس بزنه دوشن ره بزن بهادر بَوُو مَحْله ی قلدر بَوو فکر کار و کشت ووئه مار و پرِ پشت ووئه زمی بوره باغ بوره ییلاق و قشلاق بوره دس هیره تورو تیشه آباد هاکنه ویشه ازال وجت دَوِنّه روخنه جت بزنّه زمی ره لت بزنه لتکا ره کَت بزنه همین جوری گِتِنه آروسِ سر مِتِنه گب که نا، چو زووِنه راه شینه لو زووِنه آروسِ چکه سما نیموئه دَر وه صدا دستمال گوشه ی جا اسری ره هادائه جا بوتِمه چر هَتی ئی خی بزوئه زمی ئی حال تنه دگرسّه بلا تره بنسّه؟ دِکِت ندا شه لب ره نزو شه دل گب ره بئیمه من وه حالّه کهو وه دوش و بالّه اسری ره دستمال کش بَئیمه دلْ بیمو غش بوتمه مشتی خاله کنّی چه عجز و ناله گب بزن بو چی بَوِه کار چتی هتی بوه مالش دِمه من ته دوش گب بزنی کمّه گوش اسا خاطر جم بوه وه دلهره کم بوه بوشانیه دل گب گب دَکِته ونه لب بوته چیکار هاکنم بلم فرار هاکنم مگه مقصّرمه این همه من بِرِمه اَی مه وچه کیجائه هدیه ی بار الاهه هر چی که هادا خدا بهتره داریم رضا نکنّیم ناسپاسی خدا بووئه عاصی وچه هاده، بی حرکت بهیره دشت برکت خنه همه مکدّر شی پر نیئنه مه ور کیجای ونگ ونگه شی مشغول تفنگه شی مار که ائنه مه پش کیجا ره ندنه خش داد زننه اَی خدا چر ندائی تو ریکا 🔵 ادامه دارد... #شاعر_علی_ریاحی ⭐️ به کانال اخبار لفور بپیوندید 👇👇👇 https://eitaa.com/akhbarelafoor 🌹🌹🌹🌹🌹🌹🌹

✳️ شعر کیجا و ریکا : ⭐️ قسمت دوم ⭐️ کیجا چی فایده دارنه ریکا افاده دارنه کیجا سرافکنی ئه دسّ و دیم تلی ئه کیجا سراکو اورنه ریکائه آبرو اورنه کیجا دل غرصه ئه دل ونه دس قرمه ئه ریکا داری گته ای اتو بزه جمه ای ریکا داری کمایی مَحْله ی کدخدایی دشت دنیا ره گیرنی جای خدا ره گیرنی بالا کلسّی نیشتی همش عروسی نیشتی ریکا قند و عسله پهلوون محلّه کیجا تره قوز اورنه ریکا دک و پوز اورنه ریکا دسّ عصائه کیجا مشت بلائه ریکا داری بزرگه کوه تَرا سترگه ریکا ته سه کنه کار کم کنه ته دوش بار ریکا زمی ره گیرنه لینگ تلی ره گیرنه دارو چو ره کل کنّه ته مشکله حل کنّه دهره وه دس تور وه دوش دار  شونه لو، بی کلوش دراورنه لینگ کوشّه نکنّه کم شه توشّه زمّی ره کنّه نشا تاشنه کنّه کپا کپا ره کنّه خرمن بنج و دونه دِ صدمن هرچی بوئم از ریکا کم بوتمه ای ببا درد نیارم ته سرّه بوئم حال پسرّه ریکا شونه مله در پر ونه نارنه خور دس وِنه اتّه قمه این مله، اون محلّه قمّه کشی کنه وه ضعیف کشی کنّه وه آبرو وری کنه وه یا شرخری کنه وه وه سنگ و چو نکنّه آدم و گو نکنّه چش ونه خو نکنه تشِّ سر او نکنّه مله شونه سرکشی کنّه وه چاقو کشی چاقو زنّه بتیمه رحم نکنّه یتیمه کنه بتیم آش و لاش خرینّه نفرین و فاش کافر و بی دین وو نه اراشت و نفرین وونه ای به ثمر نرسی جر کفی و نرسّی تا جوونی، بمیری ناگهونی بمیری ته دس نرسّه نون ره بریزن تنه خون ره الهی خیر نوینّی بخاری و نرینّی دره کفی کندوون از تو نمونّه نشون جر کفی جاده هراز بل بخاری از وراز پشت سر هم اراشته بوینّم وه دکاشته کنه وه آدم کشی ماره دِنه دلغشی وه دس شکایت وونه فرار وه عادت وونه اسا فراری وونه عازم ساری وونه شونه گم و گور وونه راهی کجور وونه بلده و انگاس شونه با قمه و داس شونه پنهون توی چاه وونه وه هفته ها ماه وونه ماه هم شاید سال بوو حق وونه پامال بوو؟ همیشه بپّرسّه نچْرم و دگرسّه دارنه شه ره جا بدا دار و چوی لابلا لینگ که تنه کچ دره هرجابوری رج دره بوردِه رجِ مال دره پلیس وه دمّال دره شونه کنار اَی چِرم گوش رَسِنه وه مِرِم وه جا ره لو دننه جایزه، گو دننه پلیس وِره ماسنه پرونده ره دارسنه دادگاه محکوم وونه جوونی، مرحوم وونه وه سر شونه سر دار بیچاره مار عزادار 🔵 ادامه دارد... #شاعر_علی_ریاحی ⭐️ به کانال اخبار لفور بپیوندید 👇👇👇 https://eitaa.com/akhbarelafoor 🌹🌹🌹🌹🌹🌹🌹