✳️ موری مازندرانی برای شهید : شه دله درده دِنیا وِسّه بارم کوه تا مازرون بورِم شه زار بِنالِم بِنالِم ناله از دَرده جِدایی بِنالِم ته پَلی ته که خِدایی سَر هادِم شه صِداره شه لالایی لالایی آ پِسِر مار ته فِدایی ته گَهره تو هِدامه تا بَخِسی دِلّه دِریو هِدامه تا بَخِسی بَخِس جانا نِنا ته قَدِّه قِروون بَخِس جانا نِنا ته بِلاگِردون سونه گِل وا بَهیِّه تِکه خَنده ته دَس مِجی گِر آ لَجباز یه دَنده مه چِشه پیش نِشا جور قَد بَکِشی سَردا گِرمه روزِگار ره بَچِشی تِره مِزّیره مَرد بَدیمه دِنیا فاکُلّه چَم هِدایی چَم ته فِدا ناخَلوِتی بَدیمه راه دَکِتی لِباسه رَزم کِنه هِمراه دَکِتی ته خواستی که نِماز ره زِنده داری ته خواستی دِشمِنه شَرمَنده داری ته خواسّی وِجه ای وَطِن نَشوئه ناموس حِفظ بَمونه رَسِن نَشوئه تِره دِشمِنه تیر بَیته نِشونه مه کویِ کوتِر آ بی اوئه دونه اَتّا نِماشون آ اَذانه وَنگه خَوِر بِمو پِسِر شَهیده جَنگه سَره اِسبه چادِر پِهی هِدامه بَسوته دِلّه دِلدِهی هِدامه چِشه اَسری کِلو کِلو ره هایته غَما غِرصه مه خِشی ره په هایته بِرمه گَلی سَر ره چِنگوم بَزوئه مه باد بَکِرده دِلّه گوم بَزوئه غَما غِرصه خِنه ره دوره هایته دِتا چِش تار گِمون که کوره هایته دِتا لینگ شِل آ مِره نا دَنیِّه خَوِر بِمو پِسِر دِنیا دَنیِّه مه تاریکه خِنه ئه سوسو بورده مه دِلّه بوته مه چِشه خو بورده بِرمه واره مه درده چاره نَنه خِشی وَر نِنه غَم کِناره نَنه دیگه کورمه دِنیاره دِل دَوِسِّن بَعده ته خِرا خِشی ره بَوِسِّن اِسا پَنج شَنبه نِماشون هَسّا غَم اِسا دِنیائه غِرصه هَسِه ماتَم مِن آ تیناری آ دَرده جِدایی مِنا تَنگه دِل آ این بیوِفایی چِکِنِم روزِگار که تا نِداشته اَتّا لَحظه مه جا وِفا نِداشته ✍ شاعر : حسن رجبی #موری_مازندرانی #موری_برای_شهید 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید