حسرتم دیداریوه قارداش حسین جان اوسته من #عباسیه 🏴🍂✨🏴🍂✨🏴 #استمدا حضرت ابولفضل علیه السلام . مرحوم غلامعلی باقری الهامی (هوشی تبریزی) . حسرتم دیداریوه قارداش حسین جان اوسته من گل یخیلدیم تپراقا دین اوسته قرآن اوسته من . دوتمادیم عمرومده دینمدن مُقّدم جانیمی باشه ویردیم باش وجانیله بوگون پیمانیمی توکدولراشرارکین بوچولده نا حق قانیمی چوخ تلاش ایتدیم ازلکی عهدوپیمان اوسته من . . گرچه آلدیم مین یارا بیرسینیۀ مجروحیمه باش وجان بذل ایلدیم بو چولده امّا دینیمه یتمدی صد شکرنقصان دینیمه آئینیمه قانه باتدیم تشنه لب دین اوسته ایمان اوسته من . . مائل اولدوم شوقیله جان دینه قربان ایلییم عشقیمین اندازه سین دنیایه اعلان ایلییم اُلما قیمله بلکه درد دینه درمان ایلییم ایلدیم چوخ سعی بودرداوسته درمان اوسته من . . پیکراسلامیده وارگوردوم حال انکسار تقویت تاپسون گرک دین ای شه والاتبار مرد مردانه بو گونده ایلدیم ایثار ثار جانیمه آلدیم اودورپیکانی پیکان اوسته من . . مشق آلموشدوم ازلده سن کیمی استادیدن عین منظوره یتوشدوم سن ایدن ارشادیدن ترک جان ایتدیم اَل اوزدوم عالم ایجادیدن ایلدیم جان بذل آخرعشق جانان اوسته من . . آشنایم روز ِازّل ایتدّوقوم پیمانیله کفریله اولدوم مقابل قوۀ ایمانیله مَشی قیلدیم دین یولیله شیوۀ قرآنیله غیرقرآن اگمدیم باش اوزگه فرمان اوسته من . . دلخوشام چون غفلتیم دینیمده بیرآن اولمادی شکرلللاه باشه ویردیم عهدی نقصان اولمادی دلده دینیمدن سوا بیراوزگه عنوان اولمادی چوخ تقلا ایلدیم ازلّکی عنوان اوسته من . . دینون استقلالینه من صاقیله صول ویرموشم یعنی باشدان گچموشم بیرجفت من قول ویرموشم هرگلن پیکانه سینمده اودور یول ویرموشم یغموشام گنجینمه مرجانی مرجان اوسته من . . ای حسین ای شاه دین ای معدن مهرو وفا دیدۀ جان ودله ای خاک پائی طوطیا لطف قیل گل باشیم اوسته لطفوه جانیم فدا عالمینه فخرایدوم بولطف شایان اوسته من . . فکرخامیله بوصحراده ایا شاه حجاز اوندا که گتدی امان نامه منه اهل حجاز گوردولرگرچه شکار کرکس اولماز شاهباز لیک سندن چوخ خجیل اولدوم او بیرآن اوسته من . . گوردوم اهل کفری آخرفکراستعماریله آشکارا جنگه چخموش مردم ابراریله پنجه نرم ایتدیم بوچولده دست استثماریله مین یارا آلدیم اودوربیرقلب سوزان اوسته من . . نقشۀ آمالیم اوسته ای شه گردون حشم چوخ فعالیتله بو چولده گوتوردوم من قدم آرزو نقش برآب اولدوم یخلدی تا عَلَم تشنه لب قانه بویاندیم آب حیوان اوسته من . . بیرگولم دائم دوشرگلزاریده گل رَشگیمه خار الینده شبنم خونین قاروشدی اشگیمه ناامیداولدوم اوزومدن دگدی اوخ سومشگیمه جاندان اَل چکدیم بوگون بیرتیرپرّان اوسته من . . ای خدای بندگان عاصیه پشت وپناه (هوشیم) بیرعبدعاجز دست خالی روسیاه کِچ ابوالفضله نقدری ایتموشم جرم و گناه عذرخواهم ایتدقوم چوخ جرم وعصیان اوسته من