چیخوب شیرازه دن قرآن بو آیدا #ورود_محرم 🌿▪️✨🍂🌿▪️✨🍂🌿 #ماه محرم جوشی زنجیر رضوی زنجانی . چیخوب شیرازه دن قرآن بو آیدا اولوب قانه حسین غلطان بو آیدا . . چخوبدی مکه دن شاه مدینه گلوب چاتدی بلالی سرزمینه آخوب قانی جلالت وئردی دینه گوی اهلی ایلیوب افغان بو آیدا . . اولوب لرزان بو آی عرش معلا حسینه آغلاشور دریا و صحرا حسینیم وای دیور طاها و زهرا اولوبدی گوزلری گریان بو آیدا . . پوزولدی زینبین جاه و جلالی چوخالدی دلده دردیله ملالی باتوب قانه حسینون مه جمالی آخوب دشت بلاده قان بو آیدا . . بو آیدا دوغرانوب شهزاده اکبر گل عمری بو آیدا اولدی پرپر عبا ایچره گلوب اول ماه منظر کسیلدی تشنه لب قربان بو آیدا . . اولوب جان وئرمگه آماده قاسم زره سیز جنگ ائدوب آزاده قاسم قیزیل قانه باتوب شهزاده قاسم دوتولدی اوُل مه تابان بو آیدا . . فرات اوسته بو آی سقا یخیلدی دوشوب قولّار گل زهرا یخیلدی آت اوستوندن یره مولا بخیلدی حسین قدّی اولوب چوگان بو آیدا . . باتوب قانه حسینون جان نثاری وصیّ مصطفانون یادگاری حسینون سر سپاه نامداری پریشاندی شه مردان بو آیدا . . علی اصغر بو آیدا قانه باتدی امیب بیر اوخ جهانی گوزدن آتدی او شش ماهه بالا قان ایچدی یاتدی اونی سیراب ائدیب پیکان بو آیدا . . قماطه حنجریندن قان سوزولدی لباسه دانه ی مرجان دوزولدی باخان فکر ایلدی باشی اوزولدی اولوبدی قانیله الوان بو آیدا . . یومولدى گوزلری اول شیرخوارین بوکولدی قامتی چون شهریارین دولاندیردی ال اوسته گل عذارین اولوب پرپر گل خندان بو آیدا . .

خوشدور وئرنده جان آتا اوغلین گوره ئوله 🌱▪️✨🌱▪️✨🌱▪️✨ #شهادت حضرت علی اکبرعلیه السلام مرحوم صحاف تبریزی . خوشدور وئرنده جان آتا اوغلین گوره ئوله اما حسین نه چکدی دل ایستر اونی بُوله . میدان کربلاده الى بئلده دل ملول قان ایچره گوردی جان ویروری نوجوان اوغول . سلب اولدی صبر خاطر سلطان دیندن بی اختیار آتدی اوزین عرش زیندن . جان اوسته سالدی بیر نظر آرام جانینه یدّى قدم سوروندی یتوب نوجوانینه . ای وای اوغول دیدی یوزینه توکدی گوز یاشین توپراقلار اوستن آلدی دیز اوسته اوغول باشین . پاک ایتدی گرد طرّۂ عنبر فشاننی بیرده دوداقینون دیشینون سیلدی قاننی . بو یرده اعتقاد ایلیوب شیخ شوشتری دوشموشدی احتضاره گورن وقته اکبری . باخدوقجا جسمینه باشنا اود دوتوب یانوب گوردی وجودی تیغیله صد پاره دوغرانوب . باشی قلجلانوب بویانوب قانه خطّ و خال گلدن لطیف جسمی اولوب یرده پایمال . آغوشه چکدی جان کیمی اول ماه طلعتی دلده ولیک سونمدی نار و محبّتی . قلبی قرار دوتمادی دلدن گیدوب توان قویدی یوزین اوغول یوزینه شاه انس وجان . گل عارضینده ظاهر اولوب حال احتضار آز قالدی مرغ روحی قفسدن ایده فرار . پیغمبر اوغلی قالدى نه حاله خدا بلر بیرده او حالی اوغلى ئولن بیر آتا بلر . قالدى نه دیزده قوّتی نه دلده طاقتی جان تاپشوران دمیدی حسینون او ساعتی . گوتدی اوغول یوزیندن او دم یوز فغانیله اولدی آتا محاسنی آغشته قانیله . قویدی اوغول باشین یره فرزند بو تراب یوز دوندروب جوانلارینا ایلدی خطاب . حمل ایلیون خیامه بو صد پاره پیکری گوزلور یولین آناسى قالوب یولدا گوزلری . گر چه بو قانه باتماقنا دلخوشام اوزوم توپراقلار اسوته قویمیون امّا گوره گوزوم . جدّیم شبیهی دور بو دل آرام مه لقا گونلر ایوینده قالماقنا أولمیون رضا . باخدوقجا قانلو پیکرینه اود دوشر دله میدانه حقّى وار آناسی باش آچوق گله . قرآن کیمی وجودین ایدوبلر ورق ورق خندان اولوب یر اوسته قزل گلدی بیر طبق . بیکس آناسی عمّه لری گوز تیکوب بولا ناچار خیمه گاهه گرک نعشی حمل اولا . امر امامیله او جوانان گل عذار اول قطعه قطعه جسمی عبا ایچره یغدیلار . بیر نحویله جنازه نی یردن گوتوردیلر چوخ چوخ مشقّتیله خیامه یتوردیلر . خندان اولان او دسته گلی قویدولار یره عورت اوشاق کنیز و خانم دگدی بیر بیره . شور و نوا و غلغله افلاکه سالدیلار یکسر او دوغرانان بدن اطرافین آلدیلار . دولدی فغان و شیون و فریادیله خیام گویا حرمسرا و قیامت ایدوب قیام . باشین آچان فغان ایلین زلفینی یولان قارداشی اوغلى قانه باتان باغریقان اولان . جمله ئولنلرین هامی یاددان چخاتدیلار وا اکبرا صداسنی عرشه اوجاتدیلار . سوز دلی سکینه نون آفاقی داغلادی قارداش جنازه سین باسوب آغوشه آغلادی . پوزدی دوباره حالین او قلبی یانقلارین بیربیر کناره چکدی او پیکان سنقلارین . سو سپدی اشک چشمیله نار فراقنه قویدی یوزین یوزینه دودافین دوداقنه . عرض ایتدی قانلو گوزلرون آچ بیر اویان على دور گور اولوب ننوع باجون باغریقان على . هانسی شل اولموش ال سنی بو حالته سالوب دلدن توان و طاقت و آرامیمی آلوب . گورسون سکینه پیکریوی یرده چاک چاک قارداش نه نوع ایلمسون اوز اوزین هلاک . حسرتله قانلو گوزلریوه گوزلریم باخار قانلو گوزوم یاشی یوزه بی اختیار آخار . ای کاش على ئولیدی بو غم مبتلا باجون بو نوعی گورمییدی سنی بینوا باجون . اهل حرم سیزیلتسی وا اکبرا سسی درده گتوردی خاطر سلطان بیکسی . فرمایش ایتدی زینبه اول وارث خلیل ای غملریم شریکی جوانیم اولوب قتیل . لیلا حیا ایدور گله سن گیت باجی گتور یوخ حالی دوت الیندن اوغول نعشینه یتور . ویردی همین که رخصت او سلطان ممتحن بولمم نجه چخاتدیلا لیلانی خیمه دن . قولتوقلارینا گیردی خانمار فغانیله دولموشدی جام دیده لر اشگ روانیله . یوزده سرشگ آلى یانان قلبیده الى هر دم دیردی واولدا وای اوغول على . بیردن ایاقلاری سورونوردی او حالیلن یتدی اوغول جنازه سنه چوخ ملالیلن . بیر آه چکدی قلب بتوله سالوب شرار دوتدی یوزین حسینه او بانوی باوقار . چوخ چوخ ادبله عرض ایدوب ای وارث خلیل قربانوی قبول ایلسون خالق جلیل . بو کوفیان شقاوتنی ایتدیلر بروز جدّون شبیهی اکبری ئولدوردیلر سوسوز . دوندی اوغول جنازه سینه سالدی بیر نظر دیز تیتردی اورک دوگونوب آخدی اشگ تر . پروانه تک دولاندی اوغول باشنا آنا آز قالدی غصّه دن جگری اود دوتوب یانا . بی اختیار باشدان او دم گوتدی معجرین آغوشه باسدی جان کیمی صد پاره اکبرین . باشدان ایاقه پیکرینه باخدی آغلادی یاندی اوغول قانین یوزینه یاخدی آغلادی . گاهی اؤپردی گوزلرینی گه دوداقلارین گه سینیه باساردی باشین گه ایاقلارین . سسلردی ای امید پناهیم جوان اوغول دور گور قالوب نه حاله اوغولسوز آنان اوغول . قان اولدی غصّه دن جگریم آچ گوزن اویان قویما على بو قدری اوغ ولوای دیسون آنان .

گلم باخاندا پیکرویوه نی کیمی دله قان آغلاسام ئولنجه یری وار بو نسگله . بسکه وروبلا یاره بو بی رحم لر سنه جسمون اولوبدی رشک گلستانه گلشنه . هر رنگ گل آچوبدی بو صد پاره پیکرون زیبنده منظر اولموش عجب یاره پیکرون . بلبل کیمی فغانه گلوب ایلرم نوا لیلا چتین تاپا بیله گلزار باصفا . چکدیم اگر چه من على بیر عمر زحمتون جان دلیله ایلدیم عالمده خدمتون . گوز پرده سینده یر سنه ویردیم صباح و شام شیرین یوخی گیجه گونوز اولدی منه حرام . صد شکر گیتمدی على زحمتلریم هدر ویردی نهال زحمتیم آخرده خوش ثمر . ایتدون عزیز فاطمیه جانوی فدا مقصودیم اولدی حاصل اله گلدی مدعا . دوغراندی گل کیمی بدنون اولدی بندبند زهرا یانندا اولدوم على منده سربلند . «صحاف» ویرمه مطلبه طول ایله اختصار جنّتده سالدی قلب بتوله بو غم شرار . آغلا حسینون اکبرینه اولما دل ملول بیشک اولور جزاده بو خدمتلرون قبول . بیر اعتقاد پاکیله هر صبح و شامده گل ناله و فغانه عزای امامده . هر کیم حسینه آغلیا صدقیله بی گمان البتّه باشی اوسته گلور جان ویرن زمان

مرحبا ماه درخشاندی ابوالفضل علی #عباسیه 🌴💫🏴🌴💫🏴🌴💫🏴 #شجاعت حضرت ابوالفضل علیه السلام کربلایی محمدرضا محمدی (ناعم) . مرحبا ماه درخشاندی ابوالفضل علی قلعۀ دینه نگهباندی ابوالفضل علی پیرومکتب قرآندی ابوالفضل علی بانی سفرۀ احساندی ابوالفضل علی فاتح قلۀ ایماندی ابوالفضل علی پیکرعشقیده چون جاندی ، ابوالفضل علی . . مرکب اوستونده او سلطان موقر اوتوروب ایلیوب قلۀ ایثاری مسخر اوتوروب صورتیندن ائله بیل ماه منوّر اوتوروب صولتیندن ائله بیل حیدر صفدر اوتوروب خیمه ده دیلده دعا زینب مضطر اوتوروب عرصیه گوردی ، شتاباندی ابوالفضل علی . . قدم آتدوقجا سالور رعشه دل اعدایه جان وئرور هر نفسی ، پیکر عاشورایه بنذیور جنگ و جدلده علی اعلایه قدسیان مدح دیورعرشیده بو مولایه مرحبا جاهد والا و ملک سیمایه باخیشی خنجر برّاندی ابوالفضل علی . . شمس ، حیراندی اونون آیدان ایشیق طلعتینه رزم جامه یاراشور مرتضوی قامتینه دایانوب فوج ملک عبد کیمی طاعتینه ایلیور جنّ و بشرعرض ادب ، ساحتینه مرحبا همّتینه ، صولتینه ، غیرتینه مکتبه سلسله جنباندی ، ابوالفضل علی . . دیدی ای کوفه لیلر ، معدن احساس ، منم شیر میدان محرّم شرف النّاس منم خرمن کینه نی نابود ائلین داس ، منم شیشۀ نخوته خدشه سالان الماس منم دورد امام آلنین اؤپن مفتخر عباس منم رتبه ده محتشم انساندی ، ابوالفضل علی . . قارداشیم شیر خدا میثم تماری منم شه عالمدی حسین عبد فداکاری منم افتخاریم بودی عالمده علمداری منم قویمارام تک قالا بو چولده هواداری منم قوشونی اولماسادا ایندی سپهداری منم خادم درگه جاناندی ، ابوالفضل علی . . منه گر اذن وئره باشوزه اوت یاغدیرّام دفتر کرب و بلادن آدوزی پوزدوّرام پرچم فتحی گئدوب کاخ یزیده ویرّام کیمدی ، هند اوغلی اونون گردنینی سیندیرّام در زهرا عوضینده قاپوسین یاندیرّام آذر خرمن دوناندی ، ابوالفضل علی . . عار اولا پیشه و اندیشوزه ای قوم کفر دینی دنیایه ساتان اهل ریا فرقۀ شر گورمورم لشکروزون ذره جه تیغینده کسر گوندرون جنگیمه هر قدر واروز مرد هنر اله آلسون سپر و نیزه وشمشیر و تبر سانمیون سیز که گریزاندی ، ابوالفضل علی . . آلدی عبّاس دلاور سسین اعدا او زمان سربسر لشر کین تیتردی ، چون برگ خزان دیدیلر رزمه گلوب شیر دل عباس جوان پهلوانلار دیدی یوخ بیزده بو دعوایه توان مارد آماده اولوب خنده کنان نعره زنان خبری یوخ یل میداندی ابوالفضل علی . . عرصیه گلدی غرض مارد بی شرم و شعور هیبتی دیو کیمی قامتی ، بیر پارچا غرور چوخ غروریله تاپوب مرکز میداندا حضور روبرو اولدی او اثناده غرض شیریله مور گوردی مارد ، نجه عباس ؛ جوانمرد و غیور مرد نام آور دوراندی ابوالفضل علی . . رجزین باشلادی مارد دیدی ، ممتازمنم قدرتین دفترینه نقطۀ آغاز منم آل سفیانه مریدم که سرافراز منم فن دعواده یقین صاحب اعجاز منم افتخاریم بودی سعد اوغلونا سرباز منم ضربت تیغیمه مهماندی ، ابوالفضل علی . . دیدی عباس که ای نوکر اشرار زمان چوخ غروریله باخورسان منه ای هرزه روان چوخدا من من ائلیوب باخما منه خنده کنان کیملره فخر ائلیورسن؟ کیشی سن آخر اوتان ایندی گور من کیمم ای کور دل چرب زبان ساقی رهبرعطشاندی ابوالفضل علی . . اوره گین پنجۀ غیرت سیخانون اوغلی منم اله انگشترغیرت تاخانون اوغلی منم دوش پیغمبردینه چیخانون اوغلی منم اوتوز ایل اشکی عذاره آخانون اوغلی منم کعبه ده عزتیلن بت ییخانون اوغلی منم یادگار شه مرداندی ابوالفضل علی . . اله آل تیغیوی ای شوم و شر و پست و دنی آل طاهایه بو قدرائتمه گشاده دهنی بویارام قانووه من ایندی بو میداندا سنی باغ جنّتده سووندورم آنام فاطمه نی کسرم نسلینی قارداشیما توهین ائده نی قاتل قوم لعیناندی ، ابوالفضل علی . . گوردی مارد که حریفی نجه بی پروادی قامتیندن گورونور سرو چمن آرادی بیلدی ، عباس ، یگانه یل عاشورادی الحق الحق که علی صولتینه دارادی رزمیده یوخ بدلی واحد و بی همتادی دشمن فرقۀ عدواندی ابوالفضل علی . . ماحصل باشلادی ، دعوانی قوپوب ، گرد و غبار نیزه سین آتدی ، ابوالفضله طرف اول غدّار روبه ایستوردی ، ائده مکریله چون شیری شکار زینب غمزه ده نی دوره له دی تئز بالالار نگرانسان دئ ، گوراخ مرکزمیداندا نه وار صاحب فرّ فراواندی ، ابوالفضل علی . . مارد اول حمله ده چوخ کوشش ، بیحد ائلدی سپری ، دوتدی ابالفضل یولونی سد ائلدی چوخ شجاعانه اونون نیزه سینی ، رد ائلدی اول اگدی بلینی دوردی ، صورا مد ائلدی سپه کوفه نی حیران او رسا قد ائلدی پیکرقدرته چون جاندی ، ابوالفضل علی . . ائتدی تدبیر یورش ، الغرض عباس جوان گوشۀ چشمیله باخوب مارده اول شیر ژیان ایتی شمشیره وئروب غیضیله ، عبّاس ، تکان توزقوپوب پهنۀ میدانی ، دوتوب بیرده دومان تلّیدن زینب غمدیده باخوردی نگران زینبین روحینه ریحاندی ، ابالفضل علی

گوردی سعد اوغلی او اثناده یتوب وقت خطرچوخ قبیحانه ائدوب مرکزمیدانه نظر حسنون مرکبینی یوللادی ، میدانه ، او شر بیلدی ، تدبیری ، قویار غیرت عباسه اثر اوره گین غصه دوتار قدرت دعواسی گئدر قلزم غیرته سلطاندی ، ابوالفضل علی . . مرکبی گورجک ابالفضل اولوب درده دچار قویمادی صبری گئده الدن اودریای وقار اوز آتیندان اوچوب اولدی ، او ، آتین ، اوسته سوار مارد اول صحنه نی گورجک پوزولوب گتدی ، قرار فرصتی گوردی غنیمت ائلدی فکر فرار بیلمدی جنگیده اصلاندی ، ابوالفضل علی . . اوجا تکبیردیوب غیضیله عباس جوان مرتضی مثلی وئروب الده کی شمشیره تکان وئرمدی ، دشمن بدطینته بیر لحظه امان دیه سن نیلی بولوب حضرت موسی آرادان ماردون باشی کسیلدی بورودی ، صحنه نی قان آیت قدرت رحماندی ، ابالفضل علی . . تلّیدن باخدی حسین سسلدی ، جان جان قارداش مرحبا برج ادبده ، مه رخشان قارداش پهلوانلاری ائدن عرصه ده حیران قارداش قدرتون اولدی ، بو کفاره نمایان قارداش جانیم اولسون او اوزون قوللارا قربان قارداش حبّذا یکۀ میداندی ، ابوالفضل علی . . یوخ رجوعیم نه جفالر ائلدی قوم دغا یوز وئروب ساقی عطشانه او دم درد و بلا بی سپر قالدی ، او میداندا ائدوب آه و نوا یوز دوتوب خیمه لره سسلدی امداد اخا ماهووی قان بوریوب داده گل ای شمس هدی داده گل قانینه غلطاندی ابوالفضل علی . . بلیمه دست قضا شال شجاعت توخودی کوفه اهلینده ولی معرفت اصلا یوخودی سیّدی باشیمون هر چند بلاسی چوخودی بیلوسن سن که بو میداندا حریغیم یوخودی سینمی پارچالیان بیرجه خجالت اوخودی بودور علت بئله گریاندی ، ابوالفضل علی . . غم هجرانیمه یانما یانارعالم کوزووه باشیمی قوی یره چوخ وئرمه اذّیت ئوزووه بیر نچه کلمه دانیش مشتریم من سوزووه اوخ دگن دیده مه باخما ، بودا قربان گوزووه جان عباس فداهم باجوواهم ئوزووه فخرائدوردینینه قرباندی ابوالفضل علی . . «ناعمم» درگهووین عبد خطاکاری آقا گجه گوندوز ائده رم دلده عزاداری آقا قبروون کاش اولام بیرگجه زواری آقا مشکلوم چوخدی طبیبانه ائله یاری آقا قبریم اوّل گجه سی ، گوندرعلمداری آقا نوکره ، سرور شایاندی ابوالفضل علی .

گل ای امام زمان یتیشدی ماه عزا #ورود_محرم # 🏴💫🏴💫🏴💫🏴 ورود ماه محرم #سبک_ای_آسمان_غمون . محمد رضا صادقی . گل ای امام زمان یتیشدی ماه عزا دوشوبدی نُه فلکه دوباره شور و نوا باشلاندی مه ماتم قاره پوش اولوب عالم دولدی قلبیلره غم اباصالح اباصالح (۲) . . گل ای امام زمان حسینون ای بالاسی دوباره شال عزا سالوب باشا آناسی جنتده یانار آغلار گوزیاشین یوزه باغلار بو غمده سینه داغلار اباصالح اباصالح 2 . . بو آیدا قوم عدو دوتار سو یوللارینی سالار یره عموون یول اوسته قوللارینی جسمیندن آخار القان سو مشکین ائدر الوان لب تشنه او وئرر جان اباصالح اباصالح 2 . . سالار ربابی غمه گینه سوسوز بالالار ال اوسته اوز بالاسی بالیق کیمی چابالار سسلر ای گُل نالان گل ائتمه بیله افغان نیلوم یوخ سووا امکان اباصالح اباصالح 2 .

ای شیر صولت قارداشیم دور گلمیشم هرایه #عباسیه 🌴💫🥀🌴💫🥀🌴 #زبانحال امام حسین علیه السلام بر پیکر برادر . #سبک با صدای کربلایی پویا نبی زاده . کربلایی رحیم شایان ارومیه . ای شیر صولت قارداشیم دور گلمیشم هرایه گوزلردن آخمیش قان یاشیم جسمین دوشوب آرایه . سرویم نئجه اولدی خوللار دوشموش هایاندا قوللار ایثاریوه قربان ابوالفضل . گئتدون یاتوبدی پرچم قیزلار دوتوبلا ماتم قوللاریوا قربان ابوالفضل . . . دگمیش عمود آهنین زیبا یوزون داغیلمیش بیر اوخ ووروبلار ظلمولن شهلا گوزون داغیلمیش افسوس او زیبا قامته که ظولموله بیچیلمیش گویا که تندیس شرف شمشیریله کیچیلمیش . اوخدی بدن سراسر قاندی بلالی گوزلر اول چشم خونین بار قربان . سیندی بئلیم برادر بیر یول داغیلدی لشگر بو غیرت سرشاره قربان . . . بو حالیده خجلتده سن خالی اولوبدی مشگین قانلی گوزوندن هی آخور قانلی عذاره اشگین من آغلیرام ایندی برادر بو پاره لنمیش مشگیوه عالملر آغلار ای دلاور گوزدن آخان قان اشگیوه . ائتدون اوزون فدا سن سن معدن وفا سن دینون اولان قربانی قارداش . سن سن منیم پناهیم سن سن امید گاهیم سن ساخلادون قرآنی قارداش . .

جسمونده یاره لر تک گویده ستاره اولماز #کوچ_کربلا 🔸▪️✨🔸▪️✨🔸 #حضرت زینب علیهاسلام در قتلگاه عدلی تبریزی . . جسمونده یاره لر تک گویده ستاره اولماز سن تک شهید عشقین گل جسمی پاره اولماز . . احیای دین و قرآن ایتدون حسینیم احسن آلدون بو جانه یاره هر قدر ویردی دشمن هریاره لاله گولدی بودشت اولوبدی گلشن گرچه کسوف ایدوبسن گون استتاره اولماز . . هر یاره اوسته یاره هر بیر گلن ویروبدی راضی سالا یزیدی هر بیر گیدن ویروبدی بولمورثمین دینسن آلسون ثمن ویروبدی هیچ بیربدنده قارداش بیر بیله یاره اولماز . . شش ماهه صود امرواربونهضتونده سرباز نوک جداده با شی ایتدی سنی سر افراز منحوراولان بوغازدان سسله منی ایت اعجاز شامه گیدوربوزینب فرصت دوباره اولماز . . دین اوسته نهضت ایتدون بو اولدی امتیازون گوردون که سوتاپولمورقان اولدی دستمازون معراج حقده آچدون بو قانلی جانمازون الحق حسین زهرا حقدن کناره اولماز . . خولی ایونده باشون اولدی کول اوسته مهمان نعشون قالوب یارالی ایسی قوم اوسته عریان یوخ بارماقون الینده غارت ایدوبدی دونان بیله تعدّی و ظلم هیچ شهریاره اولماز . . شمروسنان جفاسی بوچولده عرشه چاتدی ال اوسته اصغریوه تا حرمله اوخ آتدی قانه بلشدی گولدی یومدی گوزونی یاتدی نازک بوغازا اوچ پر اوخ دگسه پاره اولماز . . ظاهرده اوخلانوبدی حنجردن اولدی پاره یخدی یزید کاخین معناده شیر خواره اولدی بو آسمان عشقه بالان ستاره جنگ وجدلده اما هیچ شیر خواره اولماز . . سندنصورا بو نهضت یتمز حسین تمامه فتح و ظفر لواسین ویرّام دیار شامه طرحین پوزوب یزیدین قویمام چاتا مرامه گتسه وقاری الدن بیر شرمساره اولماز . . . . عدلی دیور الهی منده نقدر دوزوم وار یازسام غم حسینی قورتولمیین سوزوم وار کربوبلانی گورسون حسرت قالان گوزوم وار عالم بولور بو فعله فال استخاره اولماز .

ای سرور عالم یارالی سر سنه قربان #عباسیه 🍁💫▪️✨🍁💫▪️✨ #استمداد حضرت ابوالفضل علیه السلام . هدایت تبریزی . ای سرور عالم یارالی سر سنه قربان باش گوز سنه قربان کسیک اللر سنه قربان . . چوخ ایستیری گویلوم سنی جان اوسته گوریدیم آخر نفسمده سنی درک ایلوب ئولیدیم . . آلدیم سویی سو ایچمدیم امّا ادبیمدن نامحرمیدی قویمادیم ئوپسون سو لبیمدن نفسیم سو طلب ایلدی ، گیچدیم طلبیمدن سالدیم قورویان لبلریوی یادیمه یاندیم سندن ، بالالاردان ، سوسوز اصغردن اوتاندیم . . عطشانلارا چاتسین سویی قدریمجه چالشدیم اوخ مشکه دگنده سارالیب یاندیم آلشدیم اصغر گوزومه دوردی حرارتده یانشدیم سعییم هدر اولدی سو گوروم قانه دونیدی نه غم ، بالالار سو ایچیب عبّاسین ئولیدی . . تیر محنه غصّه لی قلبیم سپر اولدی اوخ اوستومه باران کیمی یاغدی خطر اولدی قان دولدی گوزه ، بیلمدیم اصلا نه لر اولدی نه اوخ آتانی گوردی گوزوم نه داش آتانی گوردوم نه قلج نیزه نی نه یاره ورانی . . سجده گهیمی یاره لین اوخ سوزی قالسین بند دلیمی پاره لین اوخ سوزی قالسین عمروم ورقین قاره لین اوخ سوزی قالسین قالسین کی نه لر باشمه گلدی نه لر اولدی دل یاره سی خنجر یاراسندان بتر اولدی . . ال اولمادی پیکرده قویام یاره لی باشه لطفیله ئوزون قوی او شفا بخش الی باشه سن چکسن الین باشمه عزّت گلی باشه من گلماقا یوخ چاره ، منی گورماقا سن گل باش چکماقا جان اوسته غلامه آقا سن گل . . پنجَم نظره گلدی ، گوزوم گوزلره گلدی اللر کسیلنده علمین لنگره گلدی گویا کی تلاطم یارالی پیکره گلدی گوردوم کی علم یاتسا علمدار ئوله خوشدی عشقیم منی لابد یخلان پرچمه قوشدی . . من یاره لی اولسامدا یارام یادیمه دوشمز اصغر اوتوروب دلده ، بالام یادیمه دوشمز فکریم هله زینبدی ، آنام یادیمه دوشمز دوزدور کی ئوزوم تیر بلیّاته نشانم قارداش جانی سن قالدین آدامسیز نگرانم . . یاره ندی یاره گوره ، راضی اولا یاریم سنسامدا طلایم بیلیرم سنماز عیاریم سرور اولارام عالمه سندندی وقاریم گلسن دیزه آلسا باشمی عرشه اوجاللام ئولسمده ئورکلرده اوتورّام دیری قاللام . . بند اولدی ایاقیم یخلان وقته رکابه آت رم یئدی یوز یرده دگیب داشه ترابه دشمن او قدر یاره ووروب گلمز حسابه گل گور تانیارسان منی ای سرور ابرار گل گور او بنی هاشم آیندان هئچ اثر وار . . قانلی یوزومی گورماقین هئچ لذّتی یوخدی عبّاس وار ، امّا داخی مه طلعتی یوخدی تپراقیله قاندان صورا هئچ زینتی یوخدی بیر ظلم ایلیوبدور منه نامردم کوفه تپراقیله قان مه یوزومی سالدی خسوفه . . من تشنیم امّا آقا دیداروه تشنه جنّت باغی نین زینتی رخساروه تشنه دیداروه ، رخساروه ، گفتاروه تشنه سیراب ایله وصلینله منی جان سنه قربان باش گوز سنه قربان توکولن قان سنه قربان . . افسوس اولا کی اولدی هدر سعی و تلاشیم اللر کسیلیب اولدی هدف اوخلارا باشیم افسوس اولا تپراقدی قزل قاندی فراشیم قالمور او قدر زخم و جراحتدن ئولم من ئولدورمه سه یاره آقا خجلتده ئولم من . . چوخ سعی ایلدیم اولمیا خدمتده قصوریم سو الده دیدیم خیمه لره اولسون عبوریم اوخ مشکه دَینجه واریدی دلده بو شوریم فکر ایلمه کی باشه دگن یاره دن ئولدوم اوخ مشکه دگنده سارالیب غصّه دن ئولدوم . . اوخ مشکه دگنده ئورگیم بندی ئوزولدی یاندیم ، اثر مرگ ، عرق آلنمدا دوزلدی سو یوخ ، ئورگیم قانی تراب اوسته سوزولدی نیلر بئله وقته گوره سقّا الی بوشدی بئیله الی بوشلوقدان ئولوم یوز دفعه خوشدی . . آچدیم چوز آچان وقت ئوزووه گوز ، سنه باخدیم شاد اولدی ئورک تا او رخ احسنه باخدیم باخدیم ، یورولوب گوز ، یوموب آچدیم گئنه باخدیم گورماقه جمالون ایله گویلوم اسیر ایندی تأخیر ایله سن باشمی دشمن کسیر ایندی . . قان یاشدی گوزومدن توکولن عارض زرده باشیم قانی وقتنده چکیب گوزلره پرده آخر گوره بیلمم سنی امواج خطرده لطفیله نظر قیل گیلن ای شاه ولایت نظم ایلیه احوالیمی دقّتله (هدایت)