رحمت قاپوسین آچ منه ای کان کرامت #مناجات #جعفری_زنجانی . حاج علی جعفری زنجانی . رحمت قاپوسین آچ منه ای کان کرامت سن قهر ائلیینده منه کیمدور ائده رأفت . بیر مدتی آواره دولاندیم یول ایتیردیم جاهللره نفسیم منی قاتمیشدی اوساعت . بیر یولدا منی قوی ائوه سن توبه قاپوندان توّابیلرین چوخلارون ئولدوردی خجالت . خیری آپاروب شر عملیم چوخدی زیانیم گرچه بیلورم کشتی نوحیمدی ولایت . باور ائله جان و دلیلن بو سوزی ای دوست زانولریمین طاقتین آلدی بو روایت . کافیده یازوبدی بو سوزی مجلسی مرحوم هر دلده دی کفریله برابردی حسادت . ایستکلی گوزل قارداشیدی هابیل و قابیل آلّاتدی حسد قابیل ائدوب عمده جنایت . آیا من عزادار اولا بیللم حسد اولسا؟ حاشا منه الله وئره توفیق هدایت . زهرا چاقیرام صبحه کیمی سینه ویرام من ابلیسی رضا ایلموشم گئچسه عبادت . زهرانین عزیز اوغلی نماز اوسته ئولوبدی هر وقت نماز اولدی نمازین قیلا امّت . هیئتچی اذان اولدی گرک سجدیه دوشسون مسجودینی ساجد ائده شوقیله زیارت . عالمده نچه شِیدی که بی سود و ثمردی اوّلده حلال و یا حرام اولسا تجارت . ایکّیمجی عبادت ائلوری جنته گئتسون دنیاسینه مربوطیدی بو طرز عبادت . اوچّومجی عزاخانه ده آغلور نیه آغلور غفلتده دی امیدی اگر اولسا شفاعت . منکر دگولم من بو شفاعت که یرینده ای کاش بیلیدوم نه دی معنای شفاعت . آخرده بشر دهریده محکومیدی مرگه رضوانه چکر هرکیمی عقباده دیانت . اللهیله دعواده گرک اولمیا مؤمن اللهیله دعوایه چیخوب اهل خیانت . پیغمبر اسلام ائوینه اود ویروب اعدا بیرگون تیکانین درمدی بو عاشق جنت . بو درد حقیقت گتیروبدی منی نطقه واللهی یوخومدور بیرینه قصد اهانت . هرکیم عملیلن شهدا قانین ایاخلور الله اونا شمریله برابر ائده لعنت . غافللری آینتدی حسینین بو قیامی اما بو مسلمان نه قدر یوخلادی راحت . نصرانی گلوب ئوپدی حسینون یاراسیندان قرآن اوخیانلار آقیا ویردی جراحت . .