هارداسان معصومه گل اود دوتدوم اودلاندوم باجی #رضویه 🌱🏴🍁🥀🌱🏴🍁🥀 #خطاب حضرت امام رضاعلیه السلام به حضرت معصومه سلام الله علیها #مرحوم رجایی تبریزی . هارداسان معصومه گل اود دوتدوم اودلاندوم باجی دوغریب زهر جفا اکبادیمی یاندوم باجی . . گل باجی هجران غمی قارداشوی دیلدن سالوب صبریمی اوغلوم جوادین فرقتی اَلدن آلوب نه بالام گلدی نه سن گلدون گوزوم یولدا قالوب هارداسان معصومه گل اود دوتدوم اودلاندوم باجی . . شیونیم عرشه اوجالدی گلمدون فریادیمه قویدی حسرت عاقبت دشمن منی اولادیمه من غریبم کیم یتر بو غربت ایوده دادیمه هارداسان معصومه گل اود دوتدوم اودلاندوم باجی . . چوخ سُوَردیم روز و شب اولسون سیزیله الفتیم حسرتیم قالدی اورکده غربت اولدی قسمتیم گوزلریم یولدا یوزوم توپراقدا آخر ساعتیم هارداسان معصومه گل اود دوتدوم اودلاندوم باجی . . آرزو ایلر هامی دنیاده جان آسان ویره جان ویرنده باشی اوسته اهل بیتین سان ویره چوخ سُوَر قارداش باشی باجی دیزنده جان ویره هارداسان معصومه گل اود دوتدوم اودلاندوم باجی . . باد ظلم اسدی بو یرده سولدی سرو گلشنیم باخمادی بو حالیمه رحم ایتمدی اهریمنیم آخر عمرومده یانان دلده اولوب وردیم منیم هارداسان معصومه گل اود دوتدوم اودلاندوم باجی . . سانما بو دنیاده پابند جلالم آغلارام آخرت فکریله من پژمرده حالم آغلارام یالقوز ایوده آرزومند وصالم آغلارام هارداسان معصومه گل اود دوتدوم اودلاندوم باجی . . نیلورم دنیانی من عزّت لباسین سویموشام آل طاهانی وطنده دیده گریان قویموشام چکموشم بسکه بلا بو خسته جاندان دویموشام هارداسان معصومه گل اود دوتدوم اودلاندوم باجی . . نچّه ایل دور گلموشم هجران اَلیندن داده من ایچمدیم جام وصالوندان دولان پیمانه من بولمه سن حالیم ندور گر باشیم اوسته گلمه سن هارداسان معصومه گل اود دوتدوم اودلاندوم باجی . . اختیاریم الده یوخ قید ملاله بستِیَم چکموشم از بس غم محنت اورکدن خستِیَم همدمیم یوخ لبلریمدن قان آخور جان اوستِیَم هارداسان معصومه گل اود دوتدوم اودلاندوم باجی . . سنده من تک درد و غمدن بیر زمان دینجلمدون آتش هجرانه یاندون استراحت بولمدون نامه یازدوم یولّادوم یول گوزلدوم سن گلمدون هارداسان معصومه گل اود دوتدوم اودلاندوم باجی . . درد هجرانیله بولّم ایمدی سینه داغلوسان نامه مه باخدوقجا رخساره سرشکون باغلوسان باشیم اوسته گورمه دیم قارداش دیورسن آغلوسان هارداسان معصومه گل اود دوتدوم اودلاندوم باجی . . حسرت اولدی باغ وصلیمدن گلوب گُل درمه دون جان ویرونجه سسلدیم باجی منه سس ویرمه دون حیف اولا قارداشوین جان ویرماقین سن گورمدون هارداسان معصومه گل اود دوتدوم اودلاندوم باجی . . گوردولر دلدن سالوب دور محنت غربت منی ایلدی مأمون اوزی دربارینه دعوت منی قویدی بیر ظلمیله اوز اولادیمه حسرت منی هارداسان معصومه اود دوتدوم اودلاندوم باجی . . یوخ سوزوم غربتده ئولماقدان اوزومده دلخوشام وصل یاری آختاروردوم ای باجی هر صبح و شام سن گلینجه قالمارام معصومه جان چوخ ناخوشام هارداسان معصومه گل اود دوتدوم اودلاندوم باجی . . نیسگِلیم چوخدی باجی قالدی اورکده حسرتیم هر غمه فایق گلر دنیاده بیر بو محنتیم جان ویرنده باشیم اوسته آچمادی باش عترتیم هارداسان معصومه گل اود دوتدوم اودلاندوم باجی . . رسم دور قارداشنا باجی علاقه مند اولار قارداشین ناخوش گورنده ابر نیسان تک دولار قارداش ئولسه باجیلار باشین آچار گل تک سولار هارداسان معصومه گل اود دوتدوم اودلاندوم باجی . . بو دیار غربت ایچره دلخوشام بیر مطلبه نائل اولدوخ بیز ایکی قارداش باجی بو منصبه من حسینه اوخشورام سنده بلالی زینبه هارداسان معصومه گل اود دوتدوم اودلاندوم باجی . . چکمرم غم غربت ایچره یالقوز ایوده قالموشام من بیله جان ویرماقین مشقین بابامدان آلموشام کربلا میداننی جان اوسته یاده سالموشام هارداسان معصومه گل اود دوتدوم اودلاندوم باجی . . اولدی اجدادیم رضا هر محنته منه رضا باش و جانندن گیچوب دور خامس آل عبا صون نفسده ورد و ذکریم کربلا دور کربلا هارداسان معصومه گل اود دوتدوم اودلاندوم باجی . . اولما راضی درد فرقتدن گلوم من شیونه من سنون رخساریوه حسرت قالوم سنده منه بیر امیدیله بولورسن نامه گوندردیم سنه هارداسان معصومه گل اود دوتدوم اودلاندوم باجی . . دلخوشام گر مدفنیم اولدی منیم بو ارض طوس «پور بینا» و «رجائی» گلسون اولسون پای بوس بو سوزی اوغلوم رجائی یازدی از راه خلوص هارداسان معصومه گل اود دوتدوم اودلاندوم باجی . . . . #رضویه #رجایی_تبریزی #رضویه_شهادت #هارداسان_معصومه_گل_اود_دوتدوم_اودلاندوم_باجی #ترکی