حضرت رقیّه سلام الله علیها زبانحال حضرت رقیّه سلام الله علیها خرابه گوشه‌سی عمّه گتوردی جانه منی گلون چکون سیزی تاری بیر اوزگه یانه منی آچون قولومی قوری یئرده جان‌ ویروم راحت گلنده شمر اونا ویرمیون نشانه منی یوزیمه سیلی ووروب قورخورام دوباره وورا خرابه‌ده گتوره آه و الأمانه منی آلاندا معجریمی گورموشم شقاوتینی آتون دوشونده قُوووب چوخ اُویان بو یانه منی گلنده شامه پیاده یولی گَلَنمَزدیم وورا وورا گتوروب عمّه بو مکانه منی او قَدر قَمچی ووروب ایندیده باشیم آغرور چوخ اینجیدوب او ووران دمده تازیانه منی دیورسن عمّه بابان کعبیه ایدوبدی سفر نه سوزدی بو گتورور دمبدم فغانه منی آتا سفر ایلینده قیزین ایدلّه اسیر که باغلیوبله بو حالیله ریسمانه منی ز بس آجام سوسوزام عمّه جان یوخوم گلمز غریبه خوار ایلیوب گردش زمانه منی اؤزوم اسیر بویوندا دوشاخه قولدا طناب بو اهل شام مسلمان بولولّه یا نه منی نئجه روادی مسلمانه بیر بیله ذلّت روا گوروبدی قَضا بیله امتحانه منی خصوص ایدلّه منه شامیان شماتتلر بوله بوله بیر عزیزه شه جهانه منی حسین گلشنینون نو گل بهاریدیم سُموم ظلم یتوردی عجب خزانه منی هزارۀ چمن حُسن اکبرم عمّه اَجل قوییدی یئتیدیم او نوجوانه منی دوشنده مشکله سن (( ذوقیا )) چوخ آغلا منه اَلونده درگه خلاّقه دوت بهانه منی ** مرحوم ذوقی تبریزی ✍ محمد ابراهیم ذوقی تبریزی #محرم_۱۴۰۳ #خرابه #شهادت_حضرت_رقیه_سلام_الله_علیها