زبانحال حضرت امام کاظم (ع) . . . مرحوم قدرت اله نادری میانجی . . . سبک :: ای غنچه نیلوفریم ... ویرانه ده نازلو بالام... . . 🍁@torkiy🍁 جلاد الینده قالمیشام امداده گل اوغلوم موسی ابن جعفر جان وئرور بغداده گل اوغلوم . . . گل ای رضا جان گور منی مظلوم ائدوب هارون کنج قفسده بی وطن مغموم ائدوب هارون زهر ستمله حبسده مسموم ائدوب هارون زحمت چکوب بغداد آرا فریاده گل اوغلوم . . . سن که بُلورسن ای بالا فریادرس یوخدور جدیم حسین تک بی کسم بیر دادرس یوخدور زندان غریب ئولکه غریب یانیمده کس یوخدور سال بو غریبی یاده سن تئز داده گل اوغلوم . . . بیر کیمسه یوخ احوالیمی بوردا خبر آلسون تک جان وئرور یالقوز امام بیر فکریمه قالسون سویله قزیم معصومیه باشه قرا سالسون کافور سدر الده گوتور آماده گل اوغلوم . . . گل ای غریبلر ضامنی اوغلوم رضا سنسن سنده غریب منده غریب صاحب عزا سنسن دورم آلوب قوم جفا اهل وفا سنسن سن گلمسون جان وئرمرم جلاده گل اوغلوم . . . بو زیر زمین محبسده من زندانه محکومم یوخدور گناهیم ای بالا بیر پیر معصومم حسرت قالوب اولادیمه غربتده مظلومم یوخدور منیم تک خوار اولان دنیاده گل اوغلوم . . . نه وار آنا باجی منه دوتسون عزا اوغلوم یاسیمده یوخدور قزلاریم سالسون قرا اوغلوم حسرت گوزوم یولدا قالا اولما رضا اوغلوم ظاهرده ممکن اولماسا معناده گل اوغلوم . . . قویما جنازم خوار اولا ای نوگل رعنا هارون اوغولسوز بُلمسون شاد اولماسون اعدا گئت کربلایه عرض قیل اوغلون ئولور جدا بلکه سنه همراه اولا سقاده گل اوغلوم . . . عرض ائت حسین بی کسه جدا گولون سولدی عرض ائت بله حیدر بابام موسی غریب ئولدی نهر فرات اوسته یاتان عباسیمه نولدی کان شجاعت دور عمون دعواده گل اوغلوم . . . سن کربلا توپراقنی خونه قاتانلاردان ایسته کمک قورخما بالا قانه باتانلاردان گلگون کفن باشسیز بدن یرده یاتانلاردان وئرسن خبر قاسم کیمی داماده گل اوغلوم . . . بو یدّی ایلده اولمادی کیمسه سراقیمده زنجیر بوینومدا قالوب کُنده ایاقیمده اوغلوم قیزیم اهل و حرم یانموش فراقیمده یوخدور منی یاده سالان مأواده گل اوغلوم . . . هارون جنایتکاردور دویماز جنایتدن هر نه جفا ائتسه منه قالمام عبادتدن سنده گلوب بیر جرعه ایچ جام امامتدن وار طی الارضه قدرتون آزاده گل اوغلوم . . . یاز «نادری» زهر ستم سالدی منی دلدن یاندی جگر دوغراندی دل دوشدوم اوزاق ائلدن تأخیر بیر ساعت منه آرتوقدی بیر ایلدن آهو کیمی توش اولموشام صیاده گل اوغلوم . . . #سبک_ویرانه_ده_نازلو_بالام . . #جلاد_الینده_قالمیشام_امداده_گل_اوغلوم #نادری #ترکی .🍁@torkiy🍁